أستغفرو الله رب البـــــــــــــــــــــــرايا
أستغفرو الله مـــــــــــــــــــن الخطا يا
ربي زد ني عـــــــــلما نــــــــــــــافعا
ووافقنـــــــــــــي عملا صالــــــــــــح
Ayo konco-konco sareng-sareng muji
maring Gusti Allah Dzat Kang mung Siji
Gusti kang gak rabi soho ora mbayi
kang pareng rejeki saben rino wengi
Duh bolo konco ayo nyebar tresno
maring sedoyo ciptaane Allah
iku pituture saking Nabi kito
Muhammad utusane Gusti Allah
Marang wong tuwo ojo podo nacat
yento siro ora gelem kuwalat
bapak ibumu kang nggowo amanat
saking Gustine poro malaikat
Sopo wonge pengen manfaat ilmune
pituture guru kudu digatekne
yento guru susah abot gawanane
enggal ditulung lan digawakne
Akeh wong gedhe nyacah wengine
gawe turu ngibadah lan sinaune
wengi iku dowo ojo turu wae
ngibadah sinau ayo diakehne
Ayo konco-konco mumpung isih enom
podo ngakehake apalan lan nadhom
gawe cekelan wektu mripat rabun
isih iso ngaji senajan gak katon
Akeh wong wedi yento salah niat
banjur ora sido maringi manfaat
ojo wedi lamun siro salah niat
salah niat ilang jalaran wis tabiat
Alam donyo kito katon soyo nlongso
amargo saiki akeh omah koco
mongko bareng-bareng kito sami njogo
nganggo BBM-e enggal kurangono
Ing ndalem syawir ono kautaman
tinimbang sinau suwine sewulan
sopo pengen cepet paham pelajaran
syawir iso dadi dalan ingkang aman
Ayo poro konco nggowo cito-cito
kanggo ngurip-ngurip semangat ning dodo
ditulis nuli dipasang ning tembok
supoyo ileng lan diperjuangno
Yento siro kabeh wis podho sugih
ojo lali konco tonggo lan batih
seneng shodaqoh lan ngamal sholeh
dakdungakne rejekimu luwih-luwih
Ayo sedulur sami njogo adat
supoyo sugeng lan ora kaembat
adat kudu dadi cekelane umat
supoyo negarane ora cacat
Akeh wong sinau kanggo dewe-dewe
tanpo mikerne kiwo-tengene
sing ngono bakal titik ngilmune
ngeroso cukup tanpo diamalne
Derajat iku akeh ukurane
saking katone nganti jeroane
ora salah diukur saking bandane
tapi iku ukuran kang asor dewe
Wong bodho mati sedurunge mati
wong limpat urip masio wis mati
mongko ojo lali siro nggowo tali
gawe nyencang ngilmu ning endi-endi
Ing jaman saiki maksiat biasa
pacaran biasa dugem yo biasa
mongko ojo gelem dadi wong biasa
sregep ngibadahe ben luar biasa
Ojo gampang siro seneng ngroso nduwe
kabeh titipane pengerane dewe
sopo wonge gampang seneng ngroso nduwe
bakale sengsoro lamun ditinggalne
Saben-saben siro ono rejekine
ojo wedi yento kurang rejekine
kabeh wis dijatah lan ditetepake
nganti siro kabeh turu ning kubure
Ayo bolo-bolo ngakeh-ngakeh boso
supoyo ngilmune akeh ingkang teko
sopo pengen dadi penguwoso donyo
ojo mung iso nganggo boso Jowo
Ing jaman saiki akeh werto-werto
wertone akeh soho cepet teko
sopo pengen diwedeni penguwoso
penguwoso wedi maring werto-werto
Saben-saben siswo podho dadi duto
dutane poro uwong-uwong deso
bakale ditagih ugo ditakokno
anggene sinau oleh asil opo
Akeh wong pengen enthuk ilmu laduni
wayahe bar sholat mocoho ayat kursi
soho ibu bapak kudu ditoati
opo maneh Pengeran lan Kanjeng Nabi
Sopo wonge pengen nduweni karomah
kudu ngibadahe kanti istiqomah
istiqomah panggon istiqomah wayah
nuli wilangane yo kudu panggah
Jare urip iku mung mampir ngombe
kudu dugunakne seapik-apike
cobo gawe kriyo semenit wektune
tapi manfaate seabad suwine
Islam iku rohmat kagem alam donyo
mongko ojo seneng nyelo wong liyo
yento ono konco kang lakune olo
Lakune dohono wonge cedhekono
(tobi)
Senin, 11 April 2011
